Hapit na mobalik sa normal ang operasyon sa Emirates, duha ka bulan human mibuto ang panagbangi sa Middle East, ug gipahibalo kagahapong adlawa nga 96 porsyento sa ilang global route network ang nabalik na sa operasyon.
Sa pamahayag sa national carrier sa United Arab Emirates o UAE, nagpasabot kini nga nakaabot na sila sa 75 porsyento sa ilang pre-war capacity o kapin sa 1,300 ka flights matag semana padulong sa 137 ka destinasyon sa 72 ka nasod.
Bisan pa sa mga kagubot tungod sa krisis sa Middle East, miingon ang Emirates nga nakaserbisyo gihapon sila og 4.7 milyones ka pasahero gikan sa Marso 1 hangtod Abril 30.
Ang Emirates adunay 32 ka flights matag semana paingon sa Pilipinas pinaagi sa Manila, Cebu City ug Clark, apan wala niini giklaro kung ang maong mga rota mibalik na ba sa full capacity.
Base sa datos sa Civil Aviation Authority of the Philippines, adunay 24 ka flights sa Emirates ang nakansela nunot sa panagbangi gikan sa Pebrero 28 hangtod Marso 5, dihang naapektuhan sa airstrikes sa Middle East ang regional airspace.
Photo credits: Skytrax
