Nagsaulog na sa ilang ikalima nga adlawng natawhan ang nailang “Mali nonuplets”ang siyam ka managsuon nga naggunit sa world record isip labing daghang bata nga dungan nga nahimugso ug dungan sab nga naluwas.
Ang upat ka managsuong lalaki nga silang Mohammed VI, Elhadji, Oumar, ug Bah, uban sa ilang lima ka igsoong babaye nga silang Kadidia, Fatouma, Hawa, Adama, ug Oumou, anaa na karon sa maayong panglawas ug nangandam na sa pagsulod sa tunghaan.
Imbes nga magarbohong party, usa ka yano nga selebrasyon ang gipahigayon sa ilang panimalay uban sa ilang ginikanan nga silang Halima Cissé ug Abdelkader Arby, ingon man ang ilang magulang nga babaye nga si Arby, kinsa pito na ka tuig ang panuigon karon.
Sa ilang mga hulagway, dako ang pahiyom sa pamilya samtang gipakita ang ilang sertipiko gikan sa Guinness World Records. Isip inahan sa napulo ka mga anak, dili masukod ang garbo ni Halima sa maayong dagan sa panglawas sa iyang mga gagmayng bata.
Kahinumduman nga nahimugso ang maong mga bata niadtong Mayo 4, 2021, didto sa nasod sa Morocco. Milungtad og 19 ka bulan ang ilang pagpabilin sa maong dapit sa wala pa sila hingpit nga gitugotan nga makapauli sa nasod sa Mali aron maseguro ang ilang kaluwasan.
Nasayran nga gituohang pito ra ka bata ang naa sa sabakan ni Halima. Apan sa dihang gidala siya sa usa ka espesyalistang klinika sa Morocco, didto nasuta nga siyam diay ang iyang gisabak.
Naangkon sa nonuplets ang titulo nga most children delivered at a single birth to survive. Gihulipan nila sa gidaghanon ang siyam ka bata nga natawo kang Geraldine Brodrick sa Australia niadtong 1971, apan subo nga walay naluwas sa maong mga bata kaniadto.
Photo Courtesy: Guinnessworldrecords.com
