Misaka ngadto sa lima ka porsyento ang unemployment rate sa Pilipinas niining Marso 2026, sumala sa Philippine Statistics Authority (PSA).
Gitaho ni PSA USec Dennis Mapa, nga katumbas kini sa kapin kon minus 2.58 ka milyon ka mga Pilipino nga walay trabaho. Mas taas kini kumpara sa 3.9% niadtong Marso sa miaging tuig, apan gamay nga mas ubos kaysa sa natala nga lebel niadtong Pebrero.
Samtang, ang gidaghanon sa mga underemployed o kadtong kulang sa oras sa trabaho ug nangita pa og dugang panginabuhian anaa sa 12.3%, o gibana-bana nga 6.03 ka milyon ka mga tawo.
Isip tubag, gipahayag sa Department of Economy, Planning and Development (DEPDev) nga magpatuman ang gobyerno og mga lakang aron mapabilin ang trabaho ug mapalig-on ang social protection, job-skills matching, ug mga programa sa reskilling, ilabi na alang sa mga naapektuhan sa tensyon sa Middle East.
Matod ni DEPDev Secretary Arsenio Balisacan, palig-onon sa gobyerno ang paghatag og tabang sama sa fuel subsidies ug suporta sa mga transport workers, mag-uuma, ug mananagat. Gamiton usab ang mga digital platform sama sa e-wallets aron mapaspas ang pag-apud-apod sa ayuda.
Dugang pa niini, gipaniguro sa gobyerno ang padayon nga suporta sa mga Overseas Filipino Workers (OFWs) nga naapektuhan sa krisis sa Middle East, lakip na ang mga programa sa panginabuhian, pagbansay, ug tabang pinansyal. Sa kinatibuk-an, nagpabiling taas ang employment rate sa 95%, diin adunay 49.07 ka milyon ka mga Pilipino nga dunay trabaho. Nag-una gihapon ang sektor sa serbisyo isip kinadak-ang tig-empleyo, gisundan sa agrikultura ug industriya.
Photo courtesy: Philippine Statistics Authority/ Facebook
