Usa ka lalaking beaked whale o balyena nga may gitas-on nga 3.86 metros ang napalgang naglutaw sa kadagatan sakop sa lungsod sa Lianga.
Sumala sa report, nadiskubrehan kini sa usa ka mananagat nga si Bobong Labaso niadtong Mayo 4, 2026. Dali dayon niyang gipahibalo ang mga awtoridad ug mga opisyal sa barangay aron matan-aw ug mahatagan og hustong aksyon ang maong insidente.
Sa inisyal nga pagsusi, gikatahong anaa na sa stage of decomposition ang maong balyena sa dihang gisusi kini sa Municipal Agriculturist Office, kauban ang mga estudyante sa Northeastern Mindanao State University – Lianga Campus, Provincial Fisheries and Aquatic Resources, Philippine Coast Guard, ug Bureau of Fire Protection.
Matud pa sa mga otoridad, kini na ang ikaduhang patay nga balyena nga napalgan sa maong lugar. Ang una nahitabo niadtong Abril 21, 2025.
Photo courtesy: Jeszyrus Plaza, Hannah Noreen Soriano & Arnold Reataza
