Gipakusogan sa Agricultural Training Institute–Regional Training Center Caraga (ATI-Caraga) ang digital transformation sa sektor sa agrikultura pinaagi sa pagpahigayon og pagbansay ilalom sa Digital Farmers Program alang sa mga rural-based organizations (RBOs).
Subay kini sa prayoridad sa gobyerno nga modernisasyon sa agrikultura ug pagpalig-on sa digital empowerment sa mga komunidad.
Ang tulo ka adlaw nga pagbansay nga gipahigayon sa Tandag City diin nagtigom sa mga miyembro sa 4-H Club, Rural Improvement Club (RIC), RBO coordinators, ug mga lider sa mga mag-uuma gikan sa nagkalain-laing lungsod sa probinsya.
Tumong sa maong kalihokan ang pagpalambo sa kahibalo ug kahanas sa paggamit sa digital technology aron mapalapad ang access sa impormasyon, merkado, ug serbisyo alang sa sektor sa agrikultura.
Atol sa pagbansay, nakakat-on ang mga partisipante sa digital literacy, responsableng paggamit sa social media, online communication, digital safety ug marketing, content creation, e-extension services, ug paggamit sa mobile applications nga may kalabotan sa agrikultura.
Gituohanu sab sa ahensya nga kini nga mga kahanas maoy makatabang sa pagpauswag sa produksyon ug kita sa mga mag-uuma sa probinsya.
Photo courtesy: ATI-CARAGA
