Nasalbar sa National Bureau of Investigation (NBI) ang unom ka menor de edad sa usa ka operasyon batok sa human trafficking sa Bislig City niadtong Abril 30, 2026.
Sa samang operasyon, gi-aresto usab sa NBI Human Trafficking Division (NBI-HTRAD) ang usa ka indibidwal tungod sa paglapas sa Section 4(r) sa Republic Act No. 11930, o ang “Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act.”
Sumala sa imbestigasyon, ang kaso mitumaw human sa referral sa Australian Federal Police, human maaresto o madakpan ang usa ka Australian national nga konektado sa human trafficking activities.
Nadiskubre sa imbestigasyon nga ang foreign suspect nakig-communicate sa usa ka Filipina pinaagi sa Facebook. Base sa digital evidence sama sa chat logs, CSAEM, ug financial records, napamatud-an nga nakadawat og bayad ang Filipina bugti sa pagpadagan sa live online sexual exploitation sa iyang mga anak ug sa iyang mga menor de edad nga pag-umangkon.
Sa pag-verify sa impormasyon, ang NBI-HTRAD mi-iskedyul og surveillance sa usa ka hilit nga barangay ug nakumpirma ang lokasyon sa mga biktima. Human niini, nakuha ang Warrant to Search, Seize, and Examine Computer Data (WSSECD) ug dayon gipatuman ang operasyon.
Ang operasyon gihimo sa NBI-HTRAD ug NBI-CARAGA kauban ang City Social Welfare and Development Office Bislig (CSWDO) ug ang DOJ Cyber-TIP Operations Division (NCC-OSAEC-CSAEM). Sa on-site forensic examination sa mga nakumpiskar nga kagamitan, nakit-an ang ebidensya nga mitultol sa dayon nga pag-aresto sa suspek ug pagluwas sa unom ka menor de edad.
Photo courtesy: NBI
