Gibutyag sa aktres ug internet personality nga si Bea Borres ang iyang mga giatubang nga hagit isip usa ka single mother. Sa usa ka interbyu uban sa batikang broadcaster nga si Karen Davila, giingon ni Bea nga nagasuporta man sa pinansyal ang amahan sa iyang anak, apan nasakitan gihapon siya tungod sa ilang napakyas nga relasyon.
Matod pa niya, dako kaayo siyag expectations kaniadto ug daghan siyag gipangayo sa amahan sa bata, ilabi na sa panahon nga nagmabdos siya. Gihisgutan usab ni Bea ang lisod nga yugto sa iyang kinabuhi, lakip na ang iyang kasinatian sa kasubo ug kasakit, apan iyang giingon nga naka-move on na siya sa lalaki bisan wala pa siya hingpit naka-recover sa nahitabo.
Samtang nagdako ang iyang anak nga si Victoria Hope, nga napugos og pagpabilin sa Neonatal Intensive Care Unit o NICU sulod sa 44 ka adlaw, giila ni Bea ang kalisod sa pagpadako niini nga walay kumpletong pamilya.
Bisan pa niini, nagtuo siya nga mas maayong desisyon ang ilang kahimtang kaysa sa usa ka panimalay nga puno sa panaglalis. Sa katapusan, gipasiugda ni Bea nga iyang ihatag ang bug-os nga gugma sa iyang anak ug ipakita ang kahinungdanon sa self-love.
Matod pa niya, gusto niyang makita sa iyang anak kung unsa ang hustong sukdanan sa gugma pinaagi sa iyang kaugalingong ehemplo.
Photo Courtesy: PEP.ph
