Gipakusgan sa Bukidnon Police Provincial Office ang ilang mga operasyon sa pagpatuman sa balaod sa unang quarter sa CY 2026, nga miresulta sa mahinungdanong mga kalampusan sa mga kampanya batok sa kriminalidad, lakip ang ilegal nga droga, sugal, wanted persons, loose firearms, illegal mining, ug smuggling activities.
Sa padayon nga kampanya niini batok sa ilegal nga drugas, ang BUK PPO nihimo og 274 ka operasyon, hinungdan sa pagkasikop sa 340 ka mga indibidwal ug nasakmit ang 1,492.48 gramos nga shabu ug 177.49 gramos sa pinaugang dahon sa marijuana, nga adunay kinatibuk-ang Standard Drug Price nga ₱9,891,474.80.
Sa kampanya batok sa ilegal nga sugal, 68 ka mga operasyon ang nahimo, nga miresulta sa pagkasikop sa 104 ka mga indibidwal ug pagkakumpiska sa mga illegal gambling paraphernalia nga nagkantidad ug ₱57,394.00., Sa mga paningkamot nga ma-neutralize ang mga wanted persons, adunay kinatibuk-an nga 305 ka mga indibidwal ang nadakpan, lakip ang 57 ka Most Wanted Persons ug 248 Other Wanted Persons, nga nagpakita sa gipakusog nga manhunt operations sa tibuok probinsya.
Ubos sa kampanya sa “Kontra Boga” batok sa loose firearms, ang BUK PPO nipahigayon og 147 ka mga operasyon, nga miresulta sa pagkasikop sa 38 ka mga indibidwal ug pagkakompiska, pagsurender, ug pagbawi sa 202 ka mga armas. Samtang, sa kampanya batok sa iligal nga pagmina, 43 ka mga operasyon ang misangpot sa pagkasikop sa 34 ka indibidwal ug pagkasakmit sa mga ekipo ug materyales nga nagkantidad ug gibana-bana nga ₱245,250.00.
Dugang pa, sa anti-smuggling drive, ang BUK PPO mihimo og 194 ka mga operasyon batok sa mga smuggled nga sigarilyo, nga miresulta sa pagkasikop sa 203 ka mga indibidwal ug pagkasakmit sa mga kontrabando nga nagkantidad og ₱1,765,188.00.
Sa kinatibuk-an, kini nga mga hiniusang operasyon nagpasiugda sa lig-on nga pagpatuman sa balaod nga presensya sa BUK PPO, nga adunay kinatibuk-an nga 1,439 nga mga indibidwal nga naaresto sa tanan nga mga kampanya.
Photo Courtesy: BUKPPO
