Patay ang usa ka 43-anyos nga mag-uuma, human gidunggab sa iyang kainuman sa Purok Euphorbia, Barangay Sinawingan, Libungan, Cotabato, gabii niadtong Mayo 5, 2026.
Giila ang biktima nga si Elimar Rolly Bella, samtang ang suspek nga si alyas Oliver, 46-anyos, usa ka laborer ug silingan sa biktima, nga nadakpan dayon sa mga otoridad. Sumala sa imbestigasyon, alas-7:00 sa gabii dihang miadto ang duha sa balay sa ilang kaila samtang hubog ug didto nagsugod ang init nga lalis nga miabot sa sinumbagay.
Sa ilang panaglalis, giingong miibot og hait nga butang ang suspek ug gidunggab ang biktima. Nakaangkon kini og tulo ka grabeng samad sa ilok, dughan, ug hawak nga maoy hinungdan sa iyang kamatayon. Gihimo dayon ang hot pursuit operation nga mitultol sa pagdakop sa suspek sa Purok Lumboy sa maong barangay.
Sa karon, anaa na ang suspek sa kustodiya sa pulisya ug giandam na ang kasong isang-at batok kaniya.
Photo Courtesy: Wikipedia
