Mo-isyu ang Bureau of Internal Revenue (BIR) og Revenue Memorandum Circular No. 38-2026, nga naglatid sa paggamit ug mandatory nga pagbutang sa BIR Registration Seal Badge, alang sa mga negosyo nga mokita sa online platforms.
Naglangkob ang lagda sa mga online nga sellers, freelancer, propesyonal, vlogger, influencer, ug uban pang mga indibidwal nga nakaginansya sa digital nga platforms.
Imbes nga i-post ang tibuok Certificate of Registration (COR), ang badge nga adunay QR Code gikan sa Online Registration and Update System (ORUS) kinahanglang ipakita aron mapanalipdan ang sensitibong impormasyon sama sa TIN ug address sa negosyo.
Libre ang pagkuha sa badge ug mahimong makuha online o sa Revenue District Office, apan adunay Php30.00 nga Documentary Stamp Tax alang niadtong mag-update sa rehistro online.
Ang mga kasamtangang magbubuhis, dili obligado sa pag-usab sa ilang COR nga walay QR Code, apan giawhag sa pag-update alang sa mas hapsay nga pag-verify.
Matod ni BIR Commissioner Charlito Martin Mendoza, kabahin kini sa Revenue Collection and Base Protection nga paningkamot sa BIR DARES, aron masiguro nga ang mga negosyo sa digital marketplace rehistrado, makita, ug may tulubagon gikan sa sinugdanan.
Dugang pa niya, nga ang Seal Badge naghatag og proteksyon sa mga lehitimong online sellers ug nagsilbing giya sa mga konsumidor, aron daling mahibaw-an kon ang ilang transaction partner rehistrado sa BIR.
Photo Courtesy: Manila Bulletin
