Misaka ngadto sa 7.2% ang headline inflation o ang tinuig nga pagsaka sa presyo sa mga paliton niadtong Abril, ang pinakataas nga natala sulod sa 37 ka bulan. Nag-unang hinungdan niini ang kalit nga pagsaka sa presyo sa lokal nga lana ug pagkaon tungod sa kakuwang sa suplay ug epekto sa kalibutanong presyo sa lana gumikan sa nagpadayong gubat sa Middle East.
Base sa report sa Philippine Statistics Authority (PSA) niadtong Martes, Mayo 5, ang inflation rate sa miaging bulan ang pinakataas sukad niadtong Marso 2023 nga natala sa 7.6 porsyento.
Ang inflation sa pagkaon misaka ngadto sa 6% niadtong Abril gikan sa 2.9% niadtong Marso, samtang ang transportasyon milukso ngadto sa 21.4 % gikan sa 9.9% sa miaging bulan.
Ang presyo usab sa mga utilities sama sa pabalay, tubig, kuryente, gas, ug uban pang sugnod misaka sa mas paspas nga dagan nga 8.2 % kon itandi sa 4.7% sa miaging bulan.
Gipakita usab sa data sa PSA nga ang purchasing power sa piso o ang bili sa palit sa kuwarta miusos ngadto sa bag-ong record low nga 0.73, nga nagpasabot nga ang bili sa usa ka piso niadtong 2018 nawad-an na og 27 sentimos ug mobalor na lamang og 73 sentimos karong Abril.
Photo courtesy: Philippine Statistics Authority
