Gipahigayon kagahapong adlawa, Mayo 5, 2026, ang programang “ATI-RTC XII AgriSerbisyo on Wheels” sa Office of the Municipal Agriculturist sa Maitum, Sarangani Province. Tumong niini nga matabangan ang mga lokal nga mag-uuma og lubi gikan sa nagkalain-laing barangay pinaagi sa pagtudlo kanila og mga modernong pamaagi sa pagpanguma ug paghatag og direktang konsultasyon gikan sa mga eksperto sa agrikultura.
Ang mga partisipante nakadawat og libreng training kits, pagkaon, ug mga sertipiko isip pag-ila sa ilang pakigbahin sa maong bansay. Pinaagi niini, gilauman nga mas mo-uswag pa ang produksyon sa lubi ug mas mosaka ang kita sa mga mag-uuma. Kini nga inisyatiba nagpakita sa tinguha sa kagamhanan nga madala ang de-kalidad nga serbisyo direkta ngadto sa komunidad aron mapalig-on ang ilang panginabuhian.
Ang maong programa gipangunahan sa Agricultural Training Institute – Regional Training Center (ATI-RTC) XII kauban ang Municipal Agriculture Office sa Maitum. Tungod sa kaimportante sa maong kahigayonan, daling napuno ang 50 ka slots nga giandam alang sa maong kalihokan. Kini nagpamatuod sa kadasig sa mga mag-uuma nga makakat-on og bag-ong kahibalo. Nagpabiling lig-on ang suporta sa Local Government Unit sa Maitum ngadto sa ilang mga mag-uuma, kinsa giila nga dako og tabang sa seguridad sa pagkaon ug ekonomiya sa lungsod.
Photo Courtesy: Municipality of Maitum
