Wala na kaikyas pa sa mga otoridad ang usa ka lalaki atol sa gipatumang buy-bust operation didto sa Purok 8-7, Barangay Don Martin Marundan, Mati City, Davao Oriental pasado alas 9:50 sa gabii niadtong Abril 30, 2026.
Ang operasyon gihimo sa mga personahe sa Mati City Police Station, kauban ang mga sakop sa Provincial Intelligence Unit, DOPPO ug Philippine Drug Enforcement Agency (PDEA) nga nagresulta sa pagkasikop ni alyas “Boboy”.
Narekober gikan sa dinakpan ang 4 gramos nga gibug-aton sa gituohang shabu nga gibana banaang adunay standard drug price nga ₱27,200.00. Nasakmit usab ang usa ka digital weighing scale, lain-laing drug paraphernalia, marked money, ug usa ka motorsiklo.
Gimarkahan ug giimbentaryo dayun sa lugar sa nahitaboan ang nakumpiskang ebidensya uban sa mga testigo ug sa suspek mismo subay sa balaod.
Sa pagkakaron ang suspetsado anaa na sa kustodiya sa Mati City Police Station alang sa tukmang disposisyon ug mag atubang sa kasong paglapas sa RA 9165 kun Comprehensive Dangerous Drugs Act of 2002.
