Nakatala og dakong milestone ang girl group nga BINI para sa P-pop scene human sila gipasidunggan sa 2026 Billboard Women in Music nga gipahigayon sa Hollywood Palladium sa Los Angeles niadtong Abril 29, 2026. Ang walo ka miyembro sa grupo nakadawat sa Global Force Award, usa ka prestihiyosong pag-ila gikan mismo sa Billboard.
Kini pamatuod sa ilang nagkadako nga impluwensya dili lang sa Pilipinas apan lakip na usab sa internasyonal nga entablado. Bag-o lang usab silang gihatagan og Powerhouse Award sa Billboard Philippines. Para sa BINI, ang pagdawat og pasidungog dili lang simbolo sa ilang pag-usbaw gikan sa ilang debut atol sa pandemya ngadto sa pag-angkon og global nga pag-ila.
Sa ilang acceptance speech, wala matago sa grupo ang ilang kahinam nga mahimong usa sa pipila sa mga dagkong ngalan sa industriya sa musika. Gawas sa pag-ila sa Billboard, laing dako nga kalampusan alang sa BINI karong tuiga mao ang pagkahimong unang homegrown Filipino girl group nga nagpasundayag sa Coachella.
Photo Courtesy: Radar PH
