Patay ang usa ka lalaki, samtang duha ang naangol human naaksidente ang usa ka truck nga kargado og tubo sa Davao–Cotabato National Highway, Barangay Manubuan, Matalam, Cotabato, alas-10:25 sa buntag niadtong Mayo 1, 2026.
Giila ang namatay nga biktima nga si Nawi Manion Pino, 28-anyos, samtang angol usab sila Nasser Manion Pino, 35-anyos ug Baida Salilama Macapindeg, 27-anyos, nga pulos residente sa maong barangay.
Sa inisyal nga imbestigasyon sa pulisya, giingong nakasinati og brake failure ang Isuzu Forward nga gimaneho ni Rey Josua Poliga Llorca, 24-anyos, hinungdan nga nawad-an kini og kontrol ug natumba.
Tungod sa insidente, nangatagak ang mga kargang tubo ug nakaigo sa mga indibidwal nga naghulat og masakyan sa daplin sa dalan.
Dali usab nga niresponde ang mga sakop sa MDRRMO Matalam ug LGU rescue units sa lugar ug daling gidala ang mga biktima sa balay tambalanan.
Gidala usab sa kapulisan ang driver alang sa hustong disposisyon, samtang nagpadayon pa ang imbestigasyon sa maong disgrasya.
Photo Courtesy: Bong Mangambit
