Sobra sa 100% ang sufficiency level sa produksyon sa bugas sa tibuok Zamboanga Peninsula, sumala sa Department of Agriculture o DA Region 9.
Matod ni Agricultural Program Coordinating Officer Jose Agad Jr., ang 110 porsyento nga sufficiency level nagpasabot nga mas daghan ang produksyon sa bugas kumpara sa panginahanglan sa mga residente sa rehiyon.
Sa Zamboanga del Sur nga giila isip rice granary sa Zamboanga Peninsula, miabot usab sa kapin 200 porsyento ang sufficiency level.
Gipasabot sa DA nga ang maong kalampusan bunga sa padayon nga suporta sa gobyerno ngadto sa mga mag-uuma, lakip na ang paggamit sa modernong teknolohiya, irrigation projects, ug paghatag og dekalidad nga binhi.
Bisan pa niini, padayon ang pagbantay sa DA Region 9 sa suplay ug presyo sa bugas aron masiguro nga magpabiling stable ug dili maapektuhan ang mga konsumidor.
Samtang, gidasig usab niya ang mga mag-uuma nga magpadayon sa pagpalambo sa ilang produksyon aron mapadayon ang sobra nga suplay sa bugas sa rehiyon.
