Nasikop sa mga operatiba sa Marihatag Municipal Police Station (MPS) ang daghang indibidwal atol sa gilusad nga anti-illegal logging operation nga miresulta usab sa pagkadiskubre sa gidudahang ilegal nga droga niadtong Abril 30, 2025 sa Purok Mulye, Barangay Arorogan, Marihatag, Surigao del Sur.
Ang operasyon gipangulohan ni PCPT Emil S. Barro, Acting Chief of Police sa Marihatag MPS, uban sa iyang kapulisan, diin ilang nasikop ang pipila ka mga indibidwal nga gilangkuban nila alyas “Arthur”, 50-anyos, minyo ug mag-uuma nga residente sa Purok Nangka, Brgy. Bayan; alyas “Berly”, 53-anyos; alyas “Jun”, 26-anyos, mag-uuma ug residente sa Sitio Mabug, Brgy. San Isidro; alyas “Bengie”, 26-anyos, ulitawo ug mag-uuma; alyas “Redan”, 40-anyos, mag-uuma ug residente sa Sitio Palonpon, Brgy. Mahaba; ug alyas “Mar.”
Sa operasyon, narekober gikan sa ilang pagpanag-iya ang usa ka dako ug usa ka gamay nga heat-sealed transparent plastic sachet nga adunay gituohang shabu nga adunay gibana-banang gibug-aton nga 10 gramos ug kantidad nga mokabat sa ₱60,800.
Narekober usab ang duha ka motorsiklo—usa ka pula nga Rusi ug usa ka blue nga YTX Yamaha nga walay plaka ug kargado sa 20 ka piraso sa lauan lumber nga adunay nagkadaiyang sukod. Ang mga kahoy adunay gibana-banang 28 board feet ug market value nga ₱3,600.
Lakip usab sa nasakmit ang duha ka tinuod nga ₱1,000 bill, usa ka green nga belt bag, tulo ka pakete sa sigarilyo, ug upat ka lighter.
Andam nang ipasaka batok sa mga nadakpan ang kasong paglapas sa Presidential Decree 705 o ang Revised Forestry Code of the Philippines ug Section 11 sa Republic Act 9165 o Comprehensive Dangerous Drugs Act of 2002.
Photo courtesy: Marihatag MPS
