Nasikop sa kapulisan sa Barobo Municipal Police Station (MPS) ang usa ka giilang High Value Individual (HVI) ug nakompiskar ang gidudahang ilegal nga droga ug drug paraphernalia atol sa police response operation niadtong Abril 29, 2026, mga alas 10:20 sa gabii sa Purok 4A, Barangay Poblacion, Barobo, Surigao del Sur.
Ang operasyon nagsugod human makadawat og impormasyon ang Barobo MPS kabahin sa giingong ilegal nga kalihokan sa droga sa usa ka indibidwal sulod sa usa ka panimalay sa maong lugar.
Diha-diha nga miresponde ang mga personahe sa Barobo MPS nga gipangulohan ni PCPT Eric V. Dangate, Deputy Chief of Police, ubos sa superbisyon ni PMAJ Ralph Alexis O. Avenida, Acting Chief of Police, aron ipahigayon ang hustong aksyon sa kapulisan.
Sa operasyon, narekober gikan sa suspetsado ang gibana-banang 1.74 gramos sa gidudahang shabu nga adunay gibanaba nga market value nga ₱11,832.00, lakip na ang nagkadaiyang drug paraphernalia.
Sa pagkakaron, anaa na sa kustodiya sa Barobo Municipal Police Station ang suspetsado uban sa mga nasakmit nga ebidensya alang sa hustong disposisyon ug pagpasaka sa angayng kaso batok kaniya.
Photo courtesy: Barobo MPS
