Sikop sa mga personahe sa Bayugan City Police Station ang usa ka lalaki nga giila isip Top 7 Regional Most Wanted Person kagahapong adlawa, Abril 29, 2026, didto sa P-11, Barangay Poblacion, Bayugan City.
Gipangunahan ni PLTCOL Josef Carlo V. Silang, hepe sa maong estasyon, ang malampusong operasyon nga miresulta sa pagkasikop ni alyas “Erick,” 27-anyos, kinsa lumulupyo sa Barangay Santa Fe, Esperanza, Agusan del Sur. Bitbit sa mga otoridad ang Warrant of Arrest alang sa kasong Rape nga dunay kalabotan sa R.A. 7610 o ang Special Protection of Children Against Abuse, Exploitation and Discrimination Act.
Giisyu ang maong warrant sa RTC Branch 7 sa Bayugan City niadtong Abril 22, 2026, diin walay gitugot nga pyansa alang sa temporaryong kagawasan sa suspek. Gigamitan usab og duha ka body-worn cameras ang operasyon aron maseguro ang transparency ug husto nga dokumentasyon sa pagdakop.
Gipahayag ni PLTCOL Silang nga magpadayon ang ilang hugot nga kampanya batok sa mga wanted nga kriminal aron makab-ot ang hustisya sa mga biktima ug mapabilin ang kalinaw sa komunidad. Sa pagkakaron, anaa na sa kustodiya sa Bayugan City Police Station ang suspek samtang gihulat ang turn-over ngadto sa korte.
Photo courtesy: Bayugan CPS
