Posibleng mosaka ang presyo sa bugas sa nasud ngadto sa ₱60 ngadto sa ₱62 matag kilo sa Septiyembre, sumala ni Agriculture Secretary Francis Tiu Laurel Jr.
Atol sa Senate Proactive Response and Oversight for Timely and Effective Crisis Strategy (PROTECT) Committee hearing, si Laurel niingon nga ang gipaabot nga usbaw tungod sa pagsaka sa kantidad sa abono, nga halos midoble gikan sa ₱1, 650 ngadto sa ₱3,000.
Iyang gipasabot nga kon magpadayon ang mga mag-uuma sa tradisyonal nga paggamit sa urea ug dili mobalhin sa alternatibong abono nga girekomenda sa Department of Agriculture (DA), motaas ang gasto sa produksiyon nga moresulta sa mas taas nga presyo sa bugas.
Dugang pa sa kalihim nga gitun-an na sa DA ang pipila ka mga lakang aron mapugngan ang pagsaka sa presyo, lakip na ang pagpatuman sa “rice blend” ug “corn blend.”
Ang rice blend kay gisagol sa imported ug lokal nga bugas, sama sa 70-30 o 60-40 ratio, aron mamintinar ang suplay ug makatabang sa mga mag-uuma. Samtang, ang corn blend usa ka kombinasyon sa puti nga mais ug bugas sa 50-50 nga proporsiyon isip alternatibong pagkaon.
Ang gobyerno giingong padayong nangitag paagi aron mapabilin nga barato ang presyo sa bugas taliwala sa pagtaas sa gasto sa produksiyon
Photo Courtesy:A Healthier Michigan
