Giimbitar sa Presidente sa Israel nga si Isaac Herzog, si Prime Minister Benjamin Netanyahu ug sa mga prosecutors aron magtigom sa iyang opisyal nga residensya alang sa posibleng kasabotan sa nagpadayon nga kaso sa korapsyon batok sa lider sa Israel.
Ang maong imbitasyon giisyu human gipahibalo ni Herzog nga dili pa siya mohatag og desisyon sa pardon request ni Netanyahu, kondili mag-awhag sa duha ka kampo nga sulayan una ang panaghisgot sa usa ka kasabutan.
Matod sa opisina sa presidente, gituohan ni Herzog nga kinahanglan una masusi ug mahuman tanang posibleng pamaagi sa settlement talks, ug giingon nga ang diskusyon himuon nga adunay bukas nga kasingkasing ug sinsero nga tuyo. Gihangyo ang duha ka partido nga motubag hangtod Domingo.
Si Netanyahu mi-apply kaniadtong Nobyembre sa pagbasura sa iyang kaso, nga nag-ingon nga makatabang kini sa paghiusa sa nasud. Si US President Donald Trump usab mipakita og suporta sa pagtapos sa trial.
Ang kaso batok ni Netanyahu naglakip sa bribery, fraud, ug breach of trust sa tulo ka hiwalay nga kaso, ug iyang gipanghimakak ang tanang akusasyon. Ang maong trial nagpadayon na sulod sa unom ka tuig ug nakapahinungdan sa pagbahin sa publiko sa Israel.
Sa pagkakaron, wala pay opisyal nga pamahayag gikan sa kampo ni Netanyahu ug sa opisina sa attorney general.
Photo Courtesy: SBS
