Gitapos na kagahapong adlawa, Abril 29 sa House Committee on Justice ang pagdungog sa duha ka impeachment complaints batok kang Bise Presidente Sara Duterte, nga nagtutok sa pagtino sa probable cause ug sa iyang ‘kill plot’ batok ni Presidente Ferdinand Marcos Jr., First Lady Liza Araneta-Marcos ug kanhi Speaker Martin Romualdez.
Ang House Committee on Justice nideklarar og probable cause aron ma-impeach ang bise president.
Sa boto nga 53 pabor ug way pagsupak sa reklamo nilang Saballa ug Cabrera, gideklarar ang probable cause sa impeachment ni VP Duterte, busa giandam na usab ang committee report ug ang katugbang nga resolusyon alang sa sunod nga proseso sa impeachment.
Matod sa mga nag-endorso sa ikaupat nga impeachment nga sila si Manila 6th District Rep. Bienvenido Abante Jr., ug Deputy Speaker ug La Union Rep. Paolo Ortega V, ang maong hulga usa ka matang sa ‘high crime’ nga adunay records ug videos isip ebidensya.
Bisan og gitawag kini sa depensa ni VP Sara og ‘conditional threat’, ang duha ka magbabalaod niingon nga seryoso ang maong hulga ilabi na nga ang Bise Presidente mismo niingon nga dili kini komedya.
Si Luistro, sa laing bahin, namahayag nga ang katungdanan sa panel mao ang pagdeterminar sa ‘probable cause’ sa impeachment base sa ebidensya ug dili sa kasaba sa politika.
Photo Courtesy: Xinhua
