Sa pagsaulog sa National Superhero Day matag Abril 28, gihandom ang mga bayani, tinuod man o hinimo, uban na ang mga tawo nga nagmugna kanila. Sa Pilipinas, usa sa labing bantugan mao si Mars Ravelo, nga giila isip “Amahan sa Pinoy Superheroes.”
Si Ravelo, nga ang tinuod nga ngalan mao si Marcial Custodio Ravelo, natawo sa Tanza, Cavite niadtong Oktubre 9, 1916. Nailhan siya isip usa ka alamat sa kasaysayan sa Pinoy komiks, ug ikumpara pa gani sa Stan Lee sa Estados Unidos tungod sa iyang dako nga kontribusyon sa kalibutan sa superheroes.
Siya ang luyo sa daghang iconic nga karakter sama nila Darna, Captain Barbell, Dyesebel, Lastikman, ug uban pa. Kadaghanan niini nahimong mga pelikula ug teleserye nga gihigugma sa publiko sa nagkalain-laing henerasyon.
Bisan og wala makatapos og high school, napamatud-an ni Ravelo nga dili babag ang kakulang sa pormal nga edukasyon aron makab-ot ang kalampusan. Sa iyang kabatan-onan, hilig na siya magbasa sa pampublikong librarya, nga maoy nakapadasig sa iyang pagkamamugnaon.
Sa ulahi, nagtrabaho usab siya isip janitor samtang naningkamot sa iyang pangandoy sa komiks. Usa sa iyang mga mentor mao si Tony Velasquez, nga giila usab nga founding father sa Pinoy komiks. Sulod sa iyang kinabuhi, nakahimo si Ravelo og kapin 300 ka mga obra.
Ning taliwan si Ravelo niadtong Septyembre 12, 1988 tungod sa atake sa kasingkasing, apan gibiyaan niya ang usa ka dako ug lig-on nga kabilin sa industriya sa komiks.
Gihatagan usab siya og Life Achievement Award gikan sa Komiks Operation Brotherhood isip pagpasidungog sa iyang kontribusyon.
Hangtod karon, ang mga karakter nga iyang gimugna padayon nga naghatag inspirasyon sa mga Pilipino, ilabi na sa mga kabataan nga nagdamgo nga mahimong bayani sa ilang kaugalingong paagi.
