Nagpahimangno ang Department of Agriculture (DA) sa publiko batok sa nagkatag nga sayop nga impormasyon kabahin sa Swine Repopulation Project (SRP).
Sumala sa ahensya, ang programa molungtad sa tulo ka tuig nga gituyo aron mahibalik ang industriya sa baboy nga naapektuhan sa African Swine Fever (ASF).
Ang proyekto magtukod og organisado nga breeder system gikan sa source farms padulong sa multiplier ug production farms, uban sa paggamit sa siyentipiko ug biosecure nga pamaagi sa pag-atiman sa baboy.
Lakip sa programa ang pagpalit og mga gilts o batan-ong inahang baboy gikan sa mga akreditadong breeder farms.
Kini ipanghatag sa multiplier farms aron padaghanon ug maipang-apod-apod ang mga baktin ngadto sa mga benepisyaryo.
Matod pa sa DA, ang matag multiplier farm mahimong makadawat og 25 hangtod 2,000 ka gilts, depende sa ilang kapasidad. Gilauman nga pinaagi niini, mapalig-on ang suplay sa baboy ug mapaubos ang presyo sa merkado.
Gipasidan-an usab sa DA ang publiko nga mosalig lamang sa ilang opisyal nga mga plataporma alang sa tukmang impormasyon.
Photo Courtesy: Pig Progress
