Pormal nga nagpasaka og reklamo si Atty. Manases Carpio sa Quezon City Prosecutor’s Office batok sa mga taas nga opisyal sa Bangko Sentral ng Pilipinas (BSP), Anti-Money Laundering Council (AMLC), ug upat ka magbabalaod.
Lakip sa mga reklamo nga gisang-at mao ang giingong paglapas sa Republic Act No. 9160 o ang Anti-Money Laundering Act of 2001, Republic Act No. 1405 o ang Balaod sa Pagtago sa mga Deposito sa Bangko, ug Republic Act No. 10173 o ang Data Privacy Act.
Espesipikong ginganlan sa reklamo mao sila si BSP Governor Eli Remolona Jr. ug AMLC Executive Director Ronel Buenaventura. Lakip usab sa mga respondents mao sila si House Committee on Justice Chair Gerville Luistro ug ang mga representante sa party-list nga sila si Percival Cendaña, Chel Diokno, ug Leila de Lima.
Nagpasalamat lang si Carpio sa media ug wala motubag sa mga pangutana. Hinuon, ang iyang abogado nga si Peter Paul Danao ang nakig-atubang sa mga tigbalita.
Sumala ni Danao, ang mga respondents giingong nagkunsabo aron ipagawas ang mga classified bank records nga gipanalipdan sa kasamtangang mga balaod.
Photo Courtesy: Rappler
