Napahigayon ang groundbreaking ceremony alang sa lima (5) ka bag-ong classroom sa Colegio De Nabunturan sa Barangay Sasa sa maong lungsod, Abril 27, 2026.
Gitambungan ang maong kalihukan sa mga opisyal sa lokal nga panggamhanan nga gipangulohan ni Mayor Myrocell Clarin Balili, uban ang mga ginikanan ug mga estudyante nga nagpakita og kalipay ug paglaum alang sa dugang pasilidad sa eskwelahan.
Sa pakighinabi sa Juander Radyo Nabunturan News Team, gipahayag usab ni Congressman Jhong Ceneza sa probinsya sa Davao de Oro nga padayon ang suporta sa gobyerno alang sa sektor sa edukasyon.
Matod pa niya, igo pa ang gigahin nga pondo ug magpadayon ang pagtukod og dugang classroom aron matubag ang panginahanglan sa mga estudyante. Dugang pa sa kongresista, hinungdanon ang pagpalig-on sa suporta sa kabatan-onan, ilabi na sa ilang edukasyon, tungod kay kini mao ang yawe sa maayong kaugmaon.
Gidasig usab niya ang mga estudyante nga maningkamot sa ilang pagtuon aron dili na kinahanglan mangitag trabaho sa gawas sa nasud.
