Gikumpirma ni Octavio Guzman, gobernador sa Cauca Department nga miabot na sa 20 ka mga indibidwal ang namatay sa nahitabong pagpamomba sa Pan-American Highway sa habagatang-kasadpang bahin sa Colombia.
Base sa report nga 15 ka babaye ug lima ka lalaki ang namatay, samtang 36 ang naangol ug tulo niini ang anaa sa kritikal nga kahimtang nga nagpabilin sa intensive care unit. Dugang pa niini, lima usab ka bata ang nasamdan.
Ang maong insidente nagbilin ug grabeng kadaot ilabina sa mga bus ug mga van. Matod pa sa hepe sa militar nga si Hugo Lopez nga ang bomba mibuto human ang mga suspetsado mihunong sa trapiko pinaagi sa pagbabag sa dalan gamit ang usa ka bus ug laing sakyanan.
Ang insidente nahitabo usa ka bulan sa wala pa ang presidential election sa nasud nga nagdugang usab sa kabalaka sa seguridad sa umaabot nga piniliay.
Photo Courtesy: Inquirer
