Gipahayag ni Agriculture Secretary Francisco Tiu Laurel Jr. nga ang sistema sa pagkaon sa tibuok kalibutan anaa na karon sa “wild, wild west” nga panahon o pinaka worst situation.
Atol sa usa ka workshop human sa World Trade Organization Ministerial Conference, gipasabut sa kalihim nga kini tungod sa dungan nga epekto sa climate change, mga gubat sa lain-laing nasod, ug ang nagpadayon nga mga sakit sa mananap.
Matod pa niya, kini ang giisip nga “worst time” o pinakalisod nga panahon nga mahimong kalihim sa agrikultura tungod sa grabeng krisis sa patigayon.
Gihisgutan ni Tiu Laurel ang gitawag nga “triple threat” nga naglakip sa dili matagna nga dagan sa panahon sama sa El Niño ug La Niña, ingon man ang risgo sa African Swine Fever (ASF) ug bird flu.
Tungod niini, nabalda ang tradisyonal nga panahon sa ting-ani ug ang tibuok suplay sa pagkaon. Isip kanhi magpapatigayon, namatikdan niya nga mas grabe ug mas kanunay ang mga disgrasya sa merkado karon kon itandi sa milabay nga mga katuigan.
Photo Courtesy: Philippine News Agency
