Gitutokan sa lokal nga panggamhanan sa Libungan, Cotabato ug sa University of Southern Mindanao (USM)-PALMA Campuses ang pagpalapad sa ilang kooperasyon aron makahatag og dugang nga oportunidad sa edukasyon ug kalamboan sa komunidad.
Kini human sa panagtigom nila ni Mayor Angel Rose “Apol” L. Cuan, USM President Dr. Jonald Pimentel ug USM-PALMA Campus Director Dr. Ged Sumayo, sa nilabay’ng semana.
Lakip sa ilang gihisgutan ang posibleng mga programa ug kalihokan nga makatabang sa pagpalambo sa kahibalo ug kahanas sa mga residente, pagpalig-on sa serbisyo publiko ug paghatag og dugang suporta sa mga komunidad.
Gilaoman nga pinaagi sa mas lig-on nga koordinasyon tali sa lokal nga panggamhanan ug USM-PALMA Campuses, mas mapalapdan ang mga inisyatiba nga makahatag og dugayng kaayohan sa mga Libunganon.
