Sikop sa kapulisan ang usa ka 34-anyos nga mag-uuma nga giila lamang sa alyas nga “Fran,” residente sa Sitio Parayung, Barangay Guiling, Alamada, Cotabato, atol sa pagpatuman sa search warrant pasado alas 5:04 sa buntag niadtong Nobyembre 4, 2026. Ang warrant giisyu sa Regional Trial Court Branch 28 sa Midsayap, Cotabato, may kalabotan sa giingong paglapas sa Republic Act 10591 o Comprehensive Firearms and Ammunition Regulation Act ug Republic Act 9516 nga nagdili sa ilegal nga pagpanag-iya og eksplosibo.
Narekober sa operasyon ang usa ka homemade nga 12-gauge shotgun, usa ka steel magazine, duha ka buhing bala, usa ka fragmentation grenade ug usa ka kalibre .38 nga rebolber. Gipangulohan ang operasyon sa Alamada MPS uban sa suporta sa 2nd Cotabato Provincial Mobile Force Company, 1203rd Maneuver Company sa RMFB 12, RID12 Tracker Team Echo, PIT CPPO PIU ug RIU12.
Gi-inventory ug gidokumento sa mismong lugar ang tanang nakumpiskang armas ug eksplosibong butang. Ingon man, ipasumite usab ang mga narekober nga ebidensiya alang sa ballistic ug laboratory examination aron matino ang ilang mga detalye ug magamit sa dugang nga imbestigasyon. Sa pagkakaron, anaa na sa kustodiya sa kapulisan ang suspek ug giandam na usab ang angay nga silot alang sa dinakpan.
