Gianunsyo sa Department of Energy (DOE) nga operational na ang lima ka renewable energy projects nga makahatag og dugang suplay sa kuryente sa nasud.
Sumala sa DOE, ang lima ka proyekto adunay kinatibuk-ang kapasidad nga 128.9 megawatts, ug kabahin kini sa ilang tumong nga maabot ang 25 ka renewable energy storage projects nga mamugna sa dili pa matapos ang bulan.
Lakip sa mga bag-ong namugna nga pasilidad mao ang solar ug biomass projects sa Hermosa, Taft, Cordon, ug Arayat.
Sa kinatibuk-an, target sa Energy Department nga moabot sa 1,741 megawatts ang mapaandar karong Abril. Giingon sa ahensya nga ang ubang nahibiling proyekto anaa na sa final stages sa grid integration aron dali nang makonekta sa power grid.
Matud ni Energy Secretary Sharon Garin, pinaagi niini maminusan ang epekto sa pabago-bagong presyo sa imported fuel sa nasud samtang gipalig-on usab ang mas limpyo ug mas lig-on nga power system.
Dugang pa niya, kabahin usab kini sa direktiba ni President Ferdinand R. Marcos Jr. nga paspason ang pagpatuman sa 200 power projects sulod sa tulo ka tuig aron mapalig-on ang suplay sa enerhiya taliwala sa nagkataas nga panginahanglan sa nasud.
Photo courtesy: DOE
