Ginpatuman ni Sultan Kudarat Governor Datu Pax Ali S. Mangudadatu ang Executive Order Number 164, isa ka regulasyon sa pag-agi sang mga heavy truck sa National Highway sa Isulan, kaupod ang temporaryo nga pagsira sang pipila ka dalan para sa ika-28 nga Kalimudan Festival kag ika-53rd nga Founding Anniversary sang probinsya.
Suno sa kasuguan, ginadumilian ang mga heavy truck, lakip ang mga ten-wheeler, sa pag-agi sa atubang sang Provincial Capitol halin alas-Sais sang gab-i tubtob alas-Dose sang tungang gab-i, kada adlaw, umpisa Nobyembre 5 tubtob 18, 2026.
Samtang, temporaryo naman nga siraduhan sa tanan nga salakyan ang dalan sa atubang sang Provincial Capitol, Sultan Kudarat Sports and Cultural Center kag Provincial Hospital halin Nobyembre 19 tubtob 22, 2026.
May ginpatuman man nga alternatibo nga mga ruta pinaagi sa Magbanua Street, Gabion Street kag A. Adlawan-Sampao Road agud malikawan ang paggutok sang trapiko.
Ginapanawagan sa mga motorista nga sundon ang mga traffic advisory kag instruksyon sang mga otoridad agud masiguro ang kahapsay kag kaluwasan sa tion sang selebrasyon.
Photo courtesy: Gov Datu Pax Ali S. Mangudadatu
