Gipunting sa 10th Infantry (Agila) Division sa Philippine Army ang pagpalig-on sa transparency ug maayong pagdumala sa pondo sa gobyerno pinaagi sa Budget Execution Process Review (BEPR) nga gihimo sa ilang kampo sa Mawab, Davao de Oro niadtong nakalabay nga adlaw.
Kabahin sa maong kalihokan ang pagsusi sa mga proseso ug sistema sa pagdumala sa badyet sa 10ID aron masuta kung husto ug episyente ba ang paggamit sa pondo, lakip na ang pag-ila sa mga angay pang pauswagon.
Gipangunahan ang pagdawat sa grupo ni Major General Alvin Luzon, Commander sa 10ID, uban ni Colonel Tristram Tolentino ug sa mga miyembro sa BEPR Team. Gipasiugda sa 10ID nga importante ang responsableng paggamit sa pondo sa katawhan aron masuportahan ang mga operasyon ug mga buluhaton sa Philippine Army.
Subay kini sa A.G.I.L.A. leadership philosophy ni MGen. Luzon nga naglangkob sa Accountability, Growth, Integrity, Loyalty ug Achievement through Excellence isip giya sa maayong pagpangulo ug pagserbisyo sa publiko.
Photo Courtesy: 10th ID Agila Division
