Nagpagawas og bag-ong evacuation orders ang Israel alang sa mga residente sa southern Lebanon human sa pagkamatay sa usa ka sundalo ug padayon nga panagbangi batok sa grupo nga Hezbollah.
Sumala sa Israeli military, gipahimangnoan ang mga residente sa pito ka mga lungsod nga mobalhin padulong sa north ug west, lapas sa gitawag nga “buffer zone” nga kontrolado sa Israel sa wala pa ang ceasefire.
Giingon usab sa Israel nga sila nagpahigayon og airstrikes batok sa Hezbollah, rocket launchers, ug usa ka weapons depot isip tubag sa padayon nga hulga.
Gipasiugda ni Israeli Prime Minister Benjamin Netanyahu nga ang ilang prayoridad mao ang seguridad sa ilang mga sundalo ug sa mga komunidad sa nasud.
Samtang, mitubag ang Hezbollah nga dili sila mopahunong sa ilang mga pag-atake hangtod magpadayon kuno ang paglapas sa ceasefire sa Israel. Giingon sa grupo nga dili sila mosalig sa diplomasya nga ilang giingon nga napakyas na sa pagsulbad sa kagubot.
Sa miaging mga adlaw, giangkon sa Hezbollah nga ilang giatake ang Israeli troops sulod sa Lebanon, lakip na ang usa ka rescue team nga mitubag sa insidente. Gipamatud-an usab sa Israeli military nga usa ka sundalo ang namatay samtang unom ang nasamdan.
Photo courtesy: foxnews
