Duha ka sunod-sunod nga sunog ang natala syudad sa Valencia niaging Sabado Abril 25, 2026. Una niini, mikabat sa ₱97,500 ang gibanabang danyos sa sunog nga miulbo sa usa ka panimalay sa Sitio Liloan, Barangay Lumbayao, Valencia City sayo sa buntag sa maong adlaw.
Sa eksklusibong pakighinabi sa Juander Radyo Malaybalay, gipadayag ni FO1 Arangco Galimar sa BFP – Valencia nga dali ra nilang nakontrol ang kalayo ug napugngan ang pagkaylap niini ngadto sa mga silingang balay, nga posibleng hinungdan unta sa mas dako pang kadaot sa komunidad.
Nasayrang ang maong balay gipanag-iyahan ni JP Kapyo hinuon, walay tawo sulod sa panimalay sa dihang nahitabo ang insidente, ug walay samdan o casualty sa maong sunog.
Padayon pa karon ang imbestigasyon sa mga otoridad aron matino ang tinud-anay nga hinungdan sa sunog, apil na ang posibilidad sa electrical fault o napasagdan nga kalayo sa sulod sa balay.
Samtang laing insidente sa sunog usab ang nahitabo sa Purok 15, Poblacion sa syudad kung asa naluwas ang hapit na masunog, nga 57-anyos nga lalaki, ug residente sa nahisgutang lugar dihang gisulayan ang pagsalbar sa iyang motorsiklo
Alayon niini nagpagawas og pahimangno ang Bureau of Fire Protection ngadto sa publiko nga magmatngon ug magbantay sa ilang panimalay, ilabina sa husto nga paggamit sa kuryente, paglikay sa overloading sa outlets, ug dili pagbiya sa gilutuan aron malikayan ang susamang insidente
Photo Courtesy: BFP- Valencia City
