Mokabat sa dul-an tunga sa milyon ka pesos ang damyos sa nahitabong sunog sa Purok 1, Barangay Dologon, Maramag, Bukidnon, niadtong kaadlawon sa Abril 26, 2026.
Sa report gikan sa Bureau of Fire Protection (BFP), nagsugod ang kalayo alas 12:30 sa kaadlawon nga miresulta sa pagkaugdaw daghang kabalayan ug establisyemento, lakip ang gipuy-an sa pipila ka mga estudyante sa Central Mindanao University (CMU).
Subay sa inisyal nga imbestigasyon, gituohang nagsugod ang kalayo sa panimalay sa usa ka residente nga giilang si alyas “Jane.” Kinsa gikaingong nagluto gamit ang kahoy apan wala mabantayi, hinungdan sa paspas nga pagkaylap sa kalayo ngadto sa silingang mga balay.
Hingpit nga nadeklarar nga “fire out” ang insidente alas 1:20 sa kaadlawon. Hinuon walay natala nga nasamdan o nakabsan sa kinabuhi, apan ang kinatibuk-ang damyos sa kabtangan gibana-banang mikabat sa Php 490,500.00.
Padayon karon ang gihimong lawom nga imbestigasyon sa mga otoridad aron masuta ang uban pang detalye ug masiguro ang kaluwasan sa maong dapit.
Gikumpirma sab sa Office of Student Affairs and Services (OSAS) ug sa University Homestay sa CMU nga andam ilang pasilidad sa mga estudyante nga nanginahanglan og temporaryong kapuy-an
Photo Courtesy: BFP – Maramag
