Patay ang usa ka 53-anyos nga fish vendor human gipusil sa wala mailhing suspek pasado alas-5:42 sa buntag, Abril 26, 2026 sa atubangan sa dakong mall sa, Purok 15, barangay Bagontaas, Valencia City. Giila ang biktima nga si Danilo Arbiol Tupaz, residente sa barangay Lumbo sa maong dakbayan.
Sumala sa imbestigasyon, padulong unta ang biktima sa Bagontaas fish landing aron mangompra sa isda sakay sa iyang motorsiklo nga adunay sidecar sa dihang kalit gipusil igo sa ulo duol sa dunggan sa wala pa mailhi nga suspetsado.
Sa pagresponde sa kapulisan, nakit-an ang biktima nga nagbuy-od na sa yuta kinsa naligo sa kaugalingong dugo. Human sa krimen, mikalagiw dayon ang suspetsado sakay sa motorsiklo padulong sa direksyon sa Bagontaas.
Gipahigayon dayon sa Valencia City Police Station ang dragnet operation aron masikop ang suspetsado, samtang padayon ang imbestigasyon sa maong insidente.
Photo Courtesy: Valencia City PNP
