Aron malikayan ang bisan unsang trahedya taliwa sa nasinatiang grabe ka-init sa panahon, hingpit nang gimandu sa Department of Environment and Natural Resources (DENR) ang hinanaling pagpahunong sa operasyon sa tanang open ug controlled dumpsites sa tibuok Pilipinas.
Base sa memorandum nga gipagawas ni DENR OIC Assistant Secretary for Environment ug concurrent Environmental Management Bureau (EMB) Director Jacqueline Caancan, direktang gitahasan ang tanang EMB regional offices nga tutukan ang nasangpit nga kamanduan aron maprotektahan ang panglawas sa publiko ug ang kinaiyahan.
Dungan sa pagpasira, gitumbok usab sa ahensya ang 15 ka adlaw nga ultimatum sa mga operator sa mga sanitary landfill aron magsumite sa ilang contingency plan.
Nakalatid sa nasangpit nga plano ang mga kongkretong lakang nga himoon sa mga pasilidad aron malikayan ug paspas nga matubag ang hulga sa sunog ug uban pang posibleng emergency.
Gitumbok sa DENR nga ang hugot nga pagpatuman sa safe closure ug rehabilitasyon sa mga dumpsite importante aron malayo sa kakuyaw ang publiko ug mga kabtangan.
Photo Courtesy: DENR
