Gikwestyon ni kanhing presidential spokesperson nga si Atty. Harry Roque ang desisyon sa korte sa Pasig City nga nagkansela sa iyang pasaporte ug nagdeklara kaniya isip ‘pugante’.
Sa iyang online post, gibutyag ni Roque nga nagpasaka siya og petisyon sa Court of Appeals aron supakon ang ruling sa Pasig City Regional Trial Court. Lakip sa iyang gihangyo ang pag-isyu og Temporary Restraining Order aron mapugngan ang implementasyon sa desisyon.
Sumala sa kampo ni Roque, wala matod pay legal nga basehan ang maong lakang ug nalapas ang iyang katungod sama sa due process, presumption of innocence ug freedom to travel.
Giingon usab niya nga adunay grave abuse of discretion ang korte sa mga resolusyon nga gipagawas niadtong Nobyembre 2025 ug Pebrero 2026.
Gipasiugda pa niya nga wala hatagi og bili sa korte ang iyang pag-aplay og asylum sa Europe, nga matod pa kinahanglan unta sundon ubos sa international law.
Sa pagkakaron, nag-atubang si Roque og kasong qualified human trafficking nga may kalabutan sa giingong ilegal nga POGO hub sa Porac, Pampanga.
Photo Courtesy: Inquirer.com
