Gisugdan na sa probinsya sa Bukidnon ang pagpatuman sa Php20 Rice Program, usa ka flagship initiative sa Department of Agriculture (DA), diin nagsugod na usab ang mga Local Government Units (LGUs) sa pag-withdraw sa ilang alokasyon sa bugas alang sa mga benepisyaryo.
Sumala ni Glenn P. Garcia, Public Information Officer ug tigpamaba sa National Food Authority (NFA) Bukidnon, ang programa karon gipangulohan sa mga LGU ug sa Provincial Government aron mas mapalapad ang distribusyon sa barato nga bugas ngadto sa mga kabus nga sektor sa komunidad.
Gikumpirma ni Garcia nga ubay-ubay na nga mga lungsod ang nakakuha sa ilang alokasyon sa bugas. Lakip sa unang batch nga nag-withdraw mao ang Kabanglasan, Don Carlos, Pangantucan, Damulog, ug Sumilao. Gisundan kini sa Kibawe, Kitaotao, San Fernando, ug ang dakbayan sa Malaybalay.
Sa kinatibuk-an, moabot sa 2,500 ka sako sa bugas ang gi-release alang sa initial launching sa programa sa tibuok probinsya.
Gipasabot nga ang maong inisyatiba dili lamang limitado sa mga sentro o Kadiwa sites, kundili gitumong nga maabot bisan ang mga vulnerable sectors sa hilit nga mga lugar. Ang P20 Rice Program usa ka lakang aron mapalig-on ang food security, dili lamang sa Bukidnon kundi sa tibuok Region 10 ug sa nasud, ilabina sa panahon sa pagtaas sa presyo sa pagkaon
Photo Courtesy: NFA – Bukidnon
