Gipahibalo sa Department of Social Welfare and Development (DSWD) nga nag apod-apod na sila ug tig ₱5,000 nga cash assistance sa 977,036 ka mga public utility vehicle (PUV) drivers sa tibuok nasod. Apil sa nakadawat ang mga jeepney driver, tricycle driver, TNVS driver, delivery driver, ug motorcycle taxi driver.
Sumala sa DSWD, kini nga ayuda aron matabangan ang mga drayber nga naapektuhan sa pagtaas sa presyo sa gasolina tungod sa tensyon sa Middle East. Gikan kini sa programa nga Assistance to Individuals in Crisis Situation (AICS) nga adunay dako pa nga pondo para sa sunod nga payout.
Nagpadayon usab ang ahensya sa pagpangandam alang sa dugang payout, ilabi na sa mga MC taxi drivers ug delivery riders nga wala pa makadawat. Gikonsiderar usab nila ang paggamit sa digital payment aron mas paspas ug mas sayon ang paghatag sa ayuda.
Dugang sa DSWD nga padayon nilang gi-review ang mga nahitabo sa unang payout aron malikayan ang mga problema sa sunod nga distribution. Gisuportahan usab kini sa local government units ug Department of Health aron masiguro ang hapsay ang pagpanghatag sa ayuda.
