Nagpahimangno ang Public Service Division (PSD) sa Syudad sa Iligan ngadto sa tanang barangay ug sa kinatibuk-ang katawhan nga kinahanglan sistematiko ug husto ang pagsegregate ug paghipos sa basura, aron malikayan ang pagtapok sa mga basura sa palibot sa mga komunidad.
Sumala kang Aldwin Cabornay, Hepe sa Public Service Division, ang basura kinahanglan nga klarong ilain-lain ngadto sa biodegradable, recyclable, ug dili recyclable, ug ipahimutang sa saktong sudlanan aron masayon ang pag-recycle ug hustong disposal niini.
Dugang pa ni Cabornay, obligado ang mga opisyal sa barangay nga mosunod sa mga lokal nga ordinansa, lakip na ang Iligan City Environment Code ug uban pang mga polisiya sa solid waste management, nga nagmando sa mandatory nga pagsegregate sa basura.
Gipaklaro usab sa PSD nga dili kolektahon ang basura sa barangay kung wala ma-segregate ug wala mabutang sa hustong lugar, isip paagi sa pagpalig-on sa disiplina ug pagseguro nga ang basura mahatagan og husto nga pagdumala.
Gipahimangnoan usab ang mga barangay nga aktibong moapil sa koleksyon ug pagdumala sa basura pinaagi sa pagtukod ug pagpalig-on sa Barangay Materials Recovery Facilities (BMRFs) ug uban pang mga inisyatibo nga motumong sa pagmintinar sa kalimpyo sa komunidad.
Gidason pa ni Cabornay, ang matag barangay adunay dakong papel ug responsibilidad sa pagmonitor sa kahimtang sa basura ug sa pagsiguro nga limpyo ug luwas ang palibot sa ilang area of responsibility.
Gitumong usab sa pahimangno ang publiko nga likayan ang paglabay sa basura sa daplin sa kalsada, suba, ug uban pang mga lugar, tungod kay kini makadaot sa kinaiyahan, kahimsog sa katawhan, ug kaluwasan sa komunidad.
