Nagpadayon ang mga proyekto sa housing development sa syudad sa Iligan City samtang nagkadaghan ang mga pribadong developers nga nangayo og clearance ug teknikal nga tabang gikan sa Housing and Resettlement Office (HRO).
Matod pa ni Reynaldo Roque, Department Head sa HRO, usa sa mga aktibong nangalihok mao ang Jandorf, usa ka pribadong developer nga kasamtangang nagproseso na sa ilang mga clearance aron masugdan ang proyekto.
Dugang niya, adunay na usab concurrence gikan sa Sangguniang Panlungsod alang sa Altatierra project sa Dalipuga, nga nagpasabot og opisyal nga pag-uyon sa konseho alang sa maong development. Samtang nagpadayon ang pag-uswag, anaa usab sa pipeline ang ubang mga proyekto sama sa Cetusa sa Abuno, Georgia Village, ug Sofia Village sa Ditucalan.
Gipasiugda ni Roque nga aktibo ang HRO sa paghatag og technical assistance sa mga developers, ilabina sa pagproseso sa permits ug clearances.
Naglakip kini sa pakigkoordinar sa nagkalain-laing opisina sa gobyerno aron mapadali ang pagkompleto sa tanang rekisitos.
Gipaningkamotan sa buhatan sa HRO nga mapalig-on ang koordinasyon tali sa pribadong sektor ug lokal nga panggamhanan aron masiguro ang organisado ug responsableng pagpalambo sa mga komunidad sa Iligan City.
