Nakatala og 11 ka vehicular traffic accidents ang Malaybalay City Police Station Traffic Section atol sa weekend sa Abril 18-19, 2026 dungan sa kaamulan festival, lakip ang usa ka fatal accident nga miresulta sa pagkamatay sa duha ka drayber.
Sa esklusibong pakighinabi sa Juander Radyo Malaybalay ngadto ni Traffic Operation Officer ll Agustin Cepeda sa TMC Malaybalay nga base sa report, ang maong fatal accident nahitabo niadtong Abril 19 sa Bypass Road, Purok 1, Barangay Casisang, duol sa Lumina Homes, diin nagbangga ang duha ka motorsiklo. Parehong drayber ang nasawi sa maong insidente.
Gawas sa mga motorsiklo, giingong naglakip usab sa uban pang aksidente ang mga sakyanan sama sa sedan, SUV, dagkong salakyanan, ug uban pa, nga nagpakita sa nagkadaghang risgo sa dalan ilabi na sa panahon sa dakong kalihokan sa siyudad
Dugang pa nga ilang gihangyo ang publiko nga mosunod sa re-routing schemes, ug magpabiling alerto sa pagbiyahe, ug ilabi na sa mga rider ug kanunay magsul-ob og helmet aron malikayan ang grabeng kadaut o kamatayon sa disgrasya.
Gipadayon usab sa traffic section ang ilang kampanya sa edukasyon aron mapalambo ang disiplina sa mga drayber ug mapalig-on ang kaluwasan sa dalan sa tibuok siyudad
