Gipangunahan sa Department of Social Welfare and Development (DSWD) Region XII, kauban ang Congressional Office ug Lokal nga Kagamhanan sa Maasim, ang malampusong pag-apod-apod sa fuel assistance niadtong Lunes, Abril 20, 2026. Tumong niini nga mahatagan og dinalian nga suporta ang 409 ka mga rehistradong tricycle drivers sa lungsod.
Gilangkuban kini nga pundok sa kinatibuk-ang 439 ka mga benepisyaryo. Ang nahabiling 30 ka mga drayber nakatakda usab nga makadawat sa ilang ayuda karong umaabot nga Abril 24, 2026, aron masiguro nga ang tanan nga kwalipikado makadawat sa maong hinabang.
Gitunol ngadto sa matag drayber ang pinansyal nga tabang nga nagkantidad og ₱5,000.00. Kini nga ayuda gidisenyo aron pagpagaan sa kalisod nga giatubang sa sektor sa transportasyon ug aron masustinihan ang panginabuhian sa mga gagmayng drayber nga giisip nga “dugokan” sa transportasyon sa Maasim.
Nagpaabot usab og dako nga pasalamat si Municipal Mayor Zyrex C. Pacquiao ngadto sa nasudnong kagamhanan, ilabi na sa DSWD ug sa buhatan ni Cong. Steve Solon. Sumala sa Mayor, ang maong dinalian nga suporta usa ka dakong tabang alang sa mga drayber nga walay puas ang serbisyo ngadto sa komunidad sa tibuok Sarangani.
Photo courtesy:Maasim Information Office
