Gikumpirma sa Bureau of Customs (BOC) nga mokabat na sa Php2.5 bilyon ang kantidad sa ilegal nga droga nga ilang nasakmit gikan Enero hangtod Abril 2026.
Sumala sa ahensya, unom na ka kasong kriminal ang ilang napasaka may kalabutan sa ilegal nga droga atubangan sa Department of Justice (DOJ) sulod sa maong panahon.
Gipadayag usab sa BOC nga ilang giturn-over sa Philippine Drug Enforcement Agency (PDEA) ang Php30.78 milyones nga kantidad sa ketamine nga nasakmit sa Port of Clark niadtong Marso 2026.
Nasuta ang shipment human kini ma-flag ug maagian sa X-ray inspection nga nagpakita og kadudahang sulod. Atol sa makuting nga inspeksyon, nadiskobrehan ang unom ka plastic pouches nga adunay puti nga kristal nga substansya nga napamatud-ang ketamine, nga gitago sulod sa usa ka rolyo nga giputos og mga kable, nga may gibug-aton nga 6,156 gramos.
Gipagawas dayon ang Warrant of Seizure and Detention batok sa shipment tungod sa paglapas sa Customs Modernization and Tariff Act ug Republic Act No. 9165.
Ang operasyon gihimo uban ang koordinasyon sa PDEA-Airport Interdiction Unit ug Clark Inter-Agency Task Force Against Illegal Drugs, isip suporta sa kampanya sa administrasyon ni Pangulong Ferdinand Marcos Jr. batok sa ilegal nga droga ug sa pagpanalipod sa nasudnong utlanan.
Photo Courtesy: PNA
