Gipagawas sa Myanmar ang 4,335 ka binilanggo isip kabahin sa ilang tinuig nga amnestiya nga ginahimo matag selebrasyon sa Independence Day sa Enero ug Bag-ong Tuig sa Abril.
Ang maong desisyon giaprobahan ni Min Aung Hlaing, ang presidente sa Myanmar, nga nag-awhag sa pagpalig-on sa kalinaw ug rekonsilyasyon sa nasud.
Lakip sa mga gipagawas ang kapin 179 ka langyaw nga binilanggo. Gatusan ka pamilya ang nagtigom sa gawas sa Insein Prison aron mosugat sa ilang mga paryente nga nakagawas.
Usa sa pinakabantog nga nakagawas mao si kanhi presidente Win Myint, nga nadakpan human sa 2021 military coup. Apan wala pa’y kumpirmasyon kung maapil ba sa hingpit nga kagawasan si Aung San Suu Kyi, nga padayon nga nag-atubang og sentensya nga 27 ka tuig tungod sa giingong politikal nga kaso.
Sumala sa iyang abogado, nabawasan ang iyang sentensya, apan wala pa klaro kung siya ba ipahimutang sa house arrest.
Ang maong pinakabag-ong amnestiya gihimo sulod sa liderato ni Min Aung Hlaing, nga nangulo sa Myanmar coup d’état 2021 nga misangpot sa kagubot sa nasud.
Sumala sa Assistance Association for Political Prisoners, kapin 30,000 ka tawo ang napriso tungod sa politikal nga kaso sukad sa maong kudeta.
Photo Courtesy: INQUIRER.NET
