Opisyal nga giila isip pinakabatang professional rally driver ang usa ka 7-anyos sa nasud sa China, nahimong sentro sa atensyon. Imbis magduwa og video games, ang bata nagmaneho nahinuon og rally car nga makadagan og hangtod 100 km/matag oras, usa ka talagsaon nga talento sa iyang pangidaron.
Matod sa iyang amahan, nagsugod ang interes sa bata sa pagmaniho sa manibela sukad sa nag edad ug 1 ka tuig, hangtod sa nag edad ug 3-anyos, kahibalo na siya modrive og manual transmission. Dako usab ang impluwensya sa iyang pamilya, ilabina kay ang iyang mga ginikanan parehong mga race car drivers, hinungdan nga nasulod na siya sa larangan sa racing sukad pagkabata.
Bisan pa sa iyang kamaayo momaniho , adunay pipila ka mga tawo nga nagpahayag og kabalaka sa kaluwasan sa bata. Apan giingon sa iyang pamilya nga ang tanan gibuhat ubos sa istrikto nga training ug safety measures, aron masiguro ang iyang proteksyon samtang gipalambo ang iyang kahibalo.
Ang istorya sa maong bata nagpakita nga sa pipila ka lugar sama sa China, ang edad dili babag kon aduna kay talento ug suporta gikan sa pamilya apan nagpabilin gihapon nga importante ang pagbalanse sa kaluwasan ug kahimtang sa usa ka bata.
Photo Courtesy: Facts Pinas
