Nakarekord og 4,277 ka bag-ong kaso sa Human Immunodeficiency Virus (HIV) ang Pilipinas gikan Oktubre hangtod Disyembre 2025, sumala sa Department of Health (DOH).
Sa maong numero, kadaghanan mao ang mga lalaki nga niabot sa 4,038, samtang 239 ang babaye. Pinakadaghan gihapon sa edad 25–34 anyos nga adunay 45% o 1,929 ka kaso, gisundan sa 15–24 anyos nga adunay 32% o 1,361 ka kaso. Nakapabalaka usab ang 15 ka kaso nga ubos sa 15 anyos.
Mikunhod ang bag-ong kaso kumpara sa Q3 nga adunay 5,583 ka naitala, apan sa Q4, nag-average gihapon og 47 ka kaso matag adlaw. Anaa sab 1,069 ka pasyente nga naa na sa advanced HIV stage.
Sa kinatibuk-an, misaka na sa 163,454 ang total HIV cases sa nasud sukad 1984 hangtod Disyembre 2025. Bisan pa niini, mitaas usab ang gidaghanon sa mga nangayo og tabang, diin 4,760 ka indibidwal ang bag-ong nagpa-enroll sa Pre-Exposure Prophylaxis (PrEP).
Sa kasamtangan, ang 95-95-95 target sa nasud naa pa sa 61% diagnosed, 66% on treatment, ug 57% viral suppression.
Matod pa ni Health Secretary Teodoro Herbosa, ang Pilipinas karon adunay pinakataas nga bag-ong HIV cases sa Western Pacific Region, ug ang labing delikado kay daghan sa mga bag-ong kaso gikan sa kabatan-onan.
Photo Courtesy: Advin Health Care
