Nanawagan si Senador Francis “Kiko” Pangilinan sa Department of Agriculture (DA) nga gamiton dayon ang ₱18 bilyon nga wala magamit nga pondo sa 2025 aron pondohan ang subsidy sa gasolina ug abono para sa mga mag-uuma ug mangingisda.
Matod pa niya, dili na angay i-delay ang pagpagawas sa pondo tungod sa padayon nga pagsaka sa gasto nga nakaapekto sa sektor sa agrikultura ug pangisda.
Gipasiugda usab niya nga makatabang kini aron makalingkawas sa palas-anon sa mga prodyuser ug mapugngan ang pagsaka sa presyo sa pagkaon.
Bisan pa sa naunang ₱10 bilyon nga ayuda nga gihatag sa gobyerno, aduna pa’y ₱18 bilyon nga mahimong i-realign gikan sa wala magamit nga pondo sa DA.
Giawhag ni Pangilinan ang gobyerno nga paspasan ang paggamit sa pondo aron malikayan ang mas grabe nga krisis sa suplay sa pagkaon ug matabangan ang mga mag-uuma, mangingisda, ug konsumidor.
